【Emily】「夫妻檔」互換位 德總領事老婆交棒老公

【明報專訊】外交官經常派駐唔同地方，有時難免影響家人。德國駐港澳總領事同副總領事係駐港外交官中少數嘅「夫妻檔」，本身老婆施懿德（Stefanie）係總領事，老公張德林（Stefan）係副總領事，兩人近日對調職位，Stefan接棒做總領事，Stefanie就做副總領事。

呢個調職安排，原來源於德國外交部一個家庭友善政策。德國駐港總領事館喺社交網站解釋，呢個安排係德國外交部嘅職位共享（job sharing）計劃，畀外交官兼顧事業同家庭。

做咗外交官超過25年嘅Stefan同Stefanie話，相信呢個係最好嘅安排，令佢哋貢獻促進德國同香港經濟、科技、文化合作同人與人交流。兩人仲喺辦公室樓下旋轉門影相，一出一入寓意交接，相當鬼馬。