【Emily】立會正門換新裝 立體logo識發光

【明報專訊】立法會「鼓底」嘅正門入口光線一向唔太夠，最近立法會秘書處邀請咗香港知專設計學院嘅學生幫手設計，正門入口換咗米白色嘅新門框，將「立」字會徽同入口名稱立體化，仲喺門框加裝LED燈，當堂光猛晒。

噚日立法會主席梁君彥同秘書長陳維安去咗正門睇亮燈效果。梁君彥話，燈一亮起，原本暗沉嘅正門同鄰近範圍即刻增添生氣，簡約又醒神，仲同周邊設計保持和諧一致，大讚知專同學仔有心思，佢相信正門入口會成為議員接受傳媒訪問嘅新地標，但都提醒呢處靠近車路，要注意安全。

知專生設計 梁君彥讚有心思

梁君彥提到，今次正門新設計嘅工程要先拆除行人路嘅地磚，又要喺地底安裝固定新門框嘅支架，再封上水泥同鋪新地磚，成個工程用咗兩個星期。佢仲話立法會夏天休會期間，除咗要做擴建工程，仲有20幾項設施要做改善工程，包括其他公眾入口等。