【Emily】丁薛祥內地輕裝出席 全國生態日 高官炎夏西裝上陣

【明報專訊】人大常委會今年6月通過將每年8月15號定為「全國生態日」，特區政府噚日都搞啟動禮響應首次全國生態日。Emily留意到，呢期大熱天時下，有份主持儀式嘅政務司長陳國基、環保署長徐浩光、署理漁護署長黎堅明3位男官員，都著全套深色西裝、打領呔出席。雖則啟動禮喺室內舉行，睇番天文台資料，噚日市區日間氣溫徘徊31℃、32℃，新界地區日間最高溫度去到34℃。

另一邊廂，國務院副總理丁薛祥出席位於浙江湖州市嘅生態日活動時，就身穿白色恤衫，台下普遍與會者都無著西裝，唔少人仲著白色短袖恤衫。丁表明，生態文明係重大政治問題同重大社會問題，要以生態日活動為契機，「增強全民生態環境保護的思想自覺和行動自覺」。

喺香港，陳國基致辭時重申，政府會加強全城推動環保，包括2050年前實現碳中和目標，同時加強保護自然生態，將來北部都會區會設立濕地公園。同場嘅港區人大常委李慧琼就話，設立全國生態日增強社會生態環境保護嘅自覺同行動力，希望可以提高各界嘅環保意識。