【Emily】拍片打氣 楊潤雄、議員邊做Gym邊撐亞運港將

【明報專訊】杭州亞運9月開幕，副律政司長張國鈞、文體旅局長楊潤雄及副局長劉震，聯同幾名立法會議員一齊拍攝短片，預先為港隊運動員打氣。其中楊潤雄仲同議員陳凱欣、新民黨陳家珮踩單車機切磋，最後誰勝誰負短片就無交代。

文體旅局噚日喺facebook發布短片，為港將打氣。片段開首，3名官員同民建聯議員鄭泳舜一齊喺健身室做運動，楊潤雄提到亞運即將揭幕，「大家一齊去做多啲運動，備戰亞運」，鄭泳舜回應話「操fit啲，為香港運動員打氣」。

今屆亞運繼續設有場地單車項目，片中陳凱欣、陳家珮及楊潤雄一齊踩單車機，Emily見到3人踩得相當落力，張國鈞、劉震同鄭泳舜就做啦啦隊打氣。杭州亞運9月23日至10月8日舉行，港隊派出逾900人嘅代表團出戰，人數係歷屆最多。文體旅局鼓勵市民屆時透過觀看電視直播為港隊「集氣」，支持香港運動員爭取佳績。