【Emily】函懲署促紓酷熱 獲回信稱近年新扇千計 太平紳士卿姐促獄中合適處裝冷氣

【明報專訊】本港夏季天氣酷熱，上月天文台一度錄得36.1℃高溫。本身係太平紳士嘅民主黨前主席劉慧卿早前去信懲教署長黃國興，要求紓緩監獄極度酷熱嘅情况，獲回信指署方近年已採取多項措施，包括加裝風扇、使用隔熱油漆等。卿姐就提出3點建議，促請署方喺合適位置安裝冷氣，並容許在囚者每日冲涼多於一次。

另促交代因中暑入院及死亡人數

卿姐早前去信懲教署關注監獄內極度酷熱嘅問題，認為要保障在囚者同懲教人員嘅人道安全同身體健康。佢話署長回信表示，近年有多項措施改善懲教設施通風，包括自2020年加裝或更換2300部風扇，喺赤柱監獄安裝新式欄柵式閘門及更換新式窗戶，喺各院所使用隔熱油漆、加裝太陽能板同種植植物。

對於懲教署已採取行動，卿姐表示歡迎，但話監獄建築因為歷史悠久導致散熱欠佳，建議署方喺合適位置安裝冷氣、容許在囚者每日冲涼多於一次。卿姐亦希望署方每日公布各監獄囚室及活動室嘅溫度，並交代獄中因中暑或熱衰竭入院治療或死亡嘅人數。