【Emily】李家超能否參與仍未知 謝展寰今赴美出席APEC

【明報專訊】被美國制裁嘅特首李家超（左圖）今年11月能否出席亞太經合組織（APEC）會議，至今仍是未知之數；另一邊廂，政府噚日公布，環境及生態局長謝展寰（右圖）今日啓程去美國西雅圖，出席亞太經合組織能源部長會議。據了解，今次謝展寰係正式獲邀出席APEC會議。

美國《華盛頓郵報》上月曾引述3名知情嘅美國官員，話白宮已經決定唔邀請李家超出席11月喺美國三藩市舉行嘅APEC會議，不過美方至今無證實相關消息。李家超因應《港區國安法》實施，喺2020年被美國列入制裁名單。謝展寰唔喺名單上。

謝展寰今次參與會議主題係「為所有人創造強韌且可持續的未來」，為期兩日嘅會議期間，亞太經合組織21個成員經濟體嘅能源部長同高層官員，會討論點樣加強合作，以加快清潔能源轉型，同時確保區內經濟可持續同共融發展。逗留美國期間，謝展寰亦會與其他亞太經合組織代表作雙邊會談，喺能源議題上就加強合作交換意見，並會參觀新能源設施，包括微軟公司嘅地熱中心。