【Emily】PMQ童創節 小朋友設計遊戲教埋你玩

【明報專訊】由「創意香港」贊助嘅創意教育項目PMQ Seed今日起舉辦「童創節」，至20日（周日）結束，主題為「Kids Connect童友引力」。策展團隊將PMQ地面廣場分成4個主題體驗空間，分別係健康、快樂、友誼、環保，仲首次畀小朋友參與活動設計、製作兼主理。

童創節事先招募近百個6至12歲嘅小朋友，組成24隊「策劃小伙伴」，透過工作坊指導佢哋，由零開始掌握遊戲設計嘅元素同步驟，進而構思同設計遊戲。

4個主題空間嘅遊戲各有不同，健康空間主要係多人互動遊戲，快樂空間會為他人帶來快樂體驗，友誼空間包含協作元素，環保空間會同參加者一齊升級再造新玩具或設計，總共有超過20個互動遊戲，負責設計嘅小朋友會喺活動期間介紹同帶領參加者玩遊戲。