【Emily】習回信港生「分享會」 特首：意義重大

【明報專訊】喺新政治形勢下，每逢國家主席習近平有重要涉港舉措或言論，官方或民間之後都舉辦唔少「學習會」、「分享會」。早前習近平向培僑中學高一年級全體學生回信，提及「愛國主義是中華民族精神的核心，廣大香港同胞素有愛國愛港光榮傳統」。政府噚日就喺政府總部舉辦「國家主席回信香港學生的重要精神」分享會，教育局話有230人出席，包括中聯辦副主任盧新寧、全國人大政協、教育團體代表、培僑中學師生及其他中學師生等。

特首李家超致辭時話，習近平回信對香港意義重大，彰顯習對香港同學嘅關懷與勉勵，形容係對全港學校嘅激勵，同埋對教育界嘅重要指引。

教育局長蔡若蓮就話，習近平回信肯定咗香港愛國教育嘅努力，當局將引領學生加深認識世情、國情同「一國兩制」制度、幫助學生厚植家國情懷、加強國家歷史與文化教育等。