【Emily】宣傳照被指似屯馬線 英國鐵路刪帖

【明報專訊】英國鐵路（National Rail）噚日喺facebook發帖宣傳，話乘客用手機就可以計劃行程，知道列車幾時到站及開出，更重要係邊個車廂有廁所。不過，帖文所用嘅相片更加引來注意，相中一個亞裔女子企喺列車門旁用手機，背景拍攝到少少車廂內櫳，唔少懷疑係港人嘅網民留言話車廂好熟面口，疑似係香港屯馬線嘅列車，有留言更直指相片顯示嘅係港鐵車廂，叫英國鐵路方面睇清楚。

網民改歌「屯馬線延至英國真的興奮」

帖文引起大批網民留言，有網民將網絡歌曲「屯馬開通真的很興奮」改做英文版「Tuen Ma…extended to UK…Really so excited」（屯馬線延至英國真的很興奮）。睇番張相，無論係車外或車內都唔係睇得好清楚，但正當網民熱烈留言討論之際，英國鐵路喺香港時間噚晚已將帖文下架，原因係乜就唔清楚。

翻查資料，原來港鐵雖然植根香港，但一直都有參與海外業務，包括瑞典、澳洲及英國等，其中喺2014年7月獲得倫敦Crossrail（伊利沙伯線）嘅列車服務專營權，亦喺2017年開始營運英國西南部鐵路。