【Emily】大埔名貓「老虎仔」逝世

【明報專訊】大埔社區前晚傳來噩耗，喺大埔中心生活嘅藥房貓「老虎仔」去世，有街坊仲喺社交群組哀悼，發起一人一相緬懷老虎仔。

近期便利店「看舖」 街坊一人一相緬懷

老虎仔係大埔中心嘅名貓，本來由藥房職員飼養，日頭會喺附近街上玩，又會喺舖頭門口曬太陽，街坊行過都會同佢打招呼，而佢最受小朋友歡迎，因為佢性格溫馴，會畀小朋友摸佢。不過，老虎仔近期「搬家」，以前夜晚會返藥房瞓，但其後走咗去隔籬間24小時便利店，由於佢好可愛，受店員鍾愛，仲喺店內放埋紙盒、貓糧，老虎仔就搬埋去便利店，自由自在日夜都可以去街玩，街坊不時喺深夜見佢坐喺便利店門口「看舖」。

有網民話老虎仔日前返便利店後瞓低唔郁，有街坊帶佢睇醫生，但話救唔番。有街坊噚日問便利店職員，職員話唔知死因。有街坊話前幾日仲見老虎仔喺街玩，唔知喺咪食錯嘢致死。