【Emily】警方5車出巡宣傳防騙 播伍仲衡作曲《凡事無免費》

【明報專訊】警務處商罪科「反詐騙協調中心」聽日起一連三日派出5架宣傳車，喺15個地點宣傳防騙資訊同派紀念品。為警方編寫防騙宣傳歌《凡事無免費》嘅著名音樂人伍仲衡，噚日亦講到親友險被騙8萬元嘅經歷。

警方、通訊辦同流動網絡營運商去年9月初成立專責小組，打擊透過電訊網絡傳送嘅詐騙電話同信息，同時加強對公衆嘅防騙工作。《凡事無免費》由伍仲衡同蕭正楠、區永權組成嘅「HEA」主唱。

伍仲衡喺記者會提到佢寫完歌後，有親友收到電話訛稱家人犯刑事罪要8萬元保釋；其親友唔識網上過數，於是到銀行排隊拎錢，仲約埋騙徒去屋企收錢，好彩親友家人得知後立即報警，阻止騙徒得逞。

警方話今年首5個月接到15,792宗詐騙案件，當中11,700宗係網上騙案，「釣魚」騙案有2369宗，釣魚騙案涉款近5000萬元。商罪科警司何銳娟話，釣魚騙案嘅騙徒會好似釣魚咁，發送大量假冒銀行、電訊公司或機構嘅電話短訊，以各種藉口套取受害人信用卡資料，例如訛稱客戶嘅帳戶積分即將到期，等人上釣，輸入信用卡資料後就會發現信用卡被盜用。