【Emily】譚文豪合資餐廳 「一日三餐」9‧30最後一天

【明報專訊】由立法會前議員譚文豪、香港中小企食店聯盟召集人林瑞華等人開設嘅食肆「一日三餐」，日前被業主大幅加租25%，以10萬元續租旺角舖位。該店噚日喺社交平台宣布，因加租安排、食材價格不斷上升等因素，無奈下決定結業，9月30日將會係最後營業日。

食材價升人手不足 復蘇遜預期再遇加租

「一日三餐」喺facebook專頁話，近日食材價格不斷上升、人手持續不足，加上經濟復蘇步伐不似預期，加租安排令經營倍添壓力。該店補充，日前訂咗中秋月餅嘅客人可如期取貨，亦會喺餘下時間維持優質服務，結業時會妥善照顧員工需要。結業消息公布後，唔少網民都留言表示可惜、希望後會有期等。

「一日三餐」喺2020年12月開張，新冠疫情期間曾因為有確診者到訪而短暫停業。該店噚日嘅帖文表示，感謝客人過去近3年嘅支持、愛護，令店舖得以捱過疫情，亦提到希望結業前可以同大家「好好說再見」，並呼籲有意洽談頂手者聯繫。