【Emily】野豬現中環 被「人道處理」

【明報專訊】近排有幾隻野豬喺市區出沒，最終都難逃厄運。噚日朝早5點幾，警方接報中環干諾道中有野豬出沒，警員到場了解，並手持盾牌戒備。現場所見，野豬喺交易廣場外一段路中心嘅花槽徘徊。其後警方喺路段放雪糕筒，途經嘅車需慢駛，附近有唔少途經者駐足圍觀並舉機拍攝。漁護署職員其後到場，先以食物吸引野豬，再以麻醉槍制服佢，將野豬放入籠帶走。

漁護署之後回覆，噚日接獲警方轉介指干諾道中發現野豬，故派員視察，發現一頭約1.2米長、重約80公斤嘅雄性野豬，考慮到該頭野豬喺市區出沒會對公眾構成危險，署方將其捕捉及「人道處理」。

早排分別有野豬喺沙田同北角出沒，最終都被漁護署職員捕走後人道處理。署方早前回覆，由2021年11月至上月29日共人道處理540頭野豬。