【Emily】有倒塌風險 尖沙嘴細葉榕古樹遭移除

【明報專訊】本港有454棵古樹被納入《古樹名木冊》（下稱「名冊」），近一半都係細葉榕。康文署噚日移除彌敦道近尖沙嘴警署外一棵高約14米、有倒塌風險嘅細葉榕，康文署口頭回覆話，2010年開始發現該樹有結構問題，研究後發現主幹基部及一條位於行人道上嘅主要枝幹有明顯木質腐爛同樹洞，最後因樹木結構狀况持續轉差，考慮道路使用者安全後移除。

護養13年 學者：相信已盡力留樹

翻查資料，被移除嘅細葉榕2004年納入名冊，對上一次檢查喺今年6月6日。康文署補充，一直有為該樹施放殺真菌劑、清理樹冠等定期檢查及風險緩減措施，2013年有為其提供金屬鐵架作支撐，可惜該樹健康及結構狀况持續轉差，考慮到有關路段交通繁忙，署方諮詢城市林務諮詢小組、油尖旺區議會等後，決定移除該樹。

成日喺附近上堂嘅浸大持續教育學院樹木課程統籌鄧銘澤，留意到該樹情况一直轉差，但相信政府希望盡量「留樹」、評估無即時倒塌危險後，先喺13年後移除樹木。佢補充細葉榕屬葉根、樹冠大嘅樹種，建議日後喺公園等空曠地方種植。