【Emily】搶港航機票難 網民吐苦水 有人只見原價飛 有人「失落」驗證碼

【明報專訊】Emily噚日報道香港航空因應政府推出「你好，香港！」活動，向市民送出9800張機票，噚日一早喺網上派發。由於名額有限，唔少市民大呻無法「搶飛」。網站朝早10點起開放，Emily嘗試登入，但揀好目的地後，頁面已經列明要等兩個鐘頭以上，其後更出現連線逾時嘅字眼。

唔少人同Emily一樣「搶」唔到機票，喺網上吐苦水，講番「卡關」經歷，例如有人進入購票頁面後，網站反而顯示機票原價，有啲列明「沒有航班可選」；亦有人入到驗證頁面後，「臨門一腳」顯示唔到驗證碼，最終同優惠機票擦身而過。當然有幸運兒分享喜悅，話只需800多元附加費及稅款就可以來回日本名古屋。

截至噚晚8點，香港航空話來往北京大興、曼谷、首爾同名古屋嘅優惠機票已經額滿。落空者仲有機會嘅，因為香港航空已經預告，稍後會推下一輪派發機票活動。