【Emily】8．15全國生態日 濕地公園免費開放

【明報專訊】內地今年起將8月15日定為全國生態日，通過多種形式開展生態文明宣傳教育活動。環境及生態局噚日宣布，政府同非政府機構都會推出多項特別活動及優惠響應，包括當日（下周二）免費開放香港濕地公園，市民可於8月15日直接經訪客中心免費入公園，場內仲有免費工作坊及導賞活動；政府又會喺8個郊野公園安排生態導賞員，提供定點自然導賞服務等；「綠在區區」會有優惠，可以用81.5折嘅積分兌換禮品。

「綠在區區」推81.5折兌賞

其他機構方面，嘉道理農場暨植物園、環保協進會、綠色力量、長春社、香港觀鳥會、香港濕地保育協會等分別會提供免費活動及優惠，包括免費開放、免費生態導賞團、夜間導賞、工作坊、講座同派發紀念品等，其中世界自然基金會香港分會（WWF Hong Kong）將於米埔辦導賞團，有意參加者需預先報名；海洋公園就會送環保扇畀當日入場者。

WWF 辦米埔導賞團

環境及生態局發言人話，活動旨在提升市民生態文明意識，對環境保護嘅自覺，並響應國家持續推進生態文明建設，促進人與自然和諧共生嘅現代化，呼籲市民踴躍參加。活動詳情可瀏覽漁護署香港生物多樣性資訊站網頁。