【Emily】中大招募60戶做防牀蝨實驗 隨機安排傳統方式或真菌新法 為期12周

【明報專訊】香港中文大學展開為期兩年嘅「消除香港牀蝨科學及行動研究」，近日喺facebook公開招募60戶受牀蝨影響嘅本地住戶做實驗，參與住戶會被隨機安排用傳統防蝨用品或真菌根除牀蝨嘅創新防蝨方法，為期12個星期，其間要做4次問卷調查；而研究方向包括調查全港家居常見嘅牀蝨品種及蝨患對市民健康嘅影響，及比較兩種防蝨方法嘅成效。

研究團隊由中大社會工作學系、公共衛生及基層醫療學院、生命科學學院嘅師生組成，團隊由2019年起以「香港滅蝨研究行動組」名義，透過網上問卷調查本港蝨患情况，同埋去受牀蝨困擾嘅市民屋企採集樣本，?家研究去到下一階段，開始研究用創新嘅方法紓緩蝨患。

研究團隊之前做調查發現，有36%受訪者喺過去一年曾經喺屋企發現牀蝨，28%嘅人感覺屋企一年四季都有牀蝨問題。團隊希望可以搵到一種有效、廉宜、對人體同環境無害嘅滅蝨方案。

如果想參與實驗，可填寫「消除香港牀蝨科學及行動研究」喺facebook專頁上載嘅表格，團隊會揀選60個家中有牀蝨嘅住戶，而屋企蝨患嚴重程度會係考慮因素之一。