【Emily】全民運動日 楊潤雄揈電子戰繩 十幾秒喘氣伸脷

【明報專訊】噚日係一年一度嘅全民運動日，高官出動推廣體育。特首李家超聯同文化體育及旅遊局長楊潤雄、康文署長劉明光等人，去到深水埗體育館撐場，參觀市民玩體適能訓練、衝浪板、電子反應架同電子戰繩，跟住輪到官員落場，楊潤雄打頭陣學玩電子戰繩，拎住兩條幾重嘅戰繩揈呀揈，在旁教練十幾秒後就叫停，見局長已喘氣，仲作狀脷都伸埋出嚟。練開氣功嘅李家超喺旁邊笑，自己無落場。

李家超同楊潤雄之後轉去另一試玩區，坐喺櫈度模仿輪椅劍擊運動員，練習電子擊靶。特首事後喺facebook話，教練教導佢要「以劍靶為目標」，一擊即中。

今次全民運動日主題係「身心力行體適能」，市民除咗可免費預訂同使用康文署轄下多項室內外康體設施，及水上活動中心嘅船，康文署噚日亦於各區指定體育館舉辦多項體適能運動和同樂活動，畀市民免費參與。