【Emily】楊何蓓茵：視實習生如家人 免「因了解分手」

【明報專訊】立法會公務員及資助機構員工事務委員會噚日開會，討論點樣鼓勵青年人才加入政府，公務員事務局長楊何蓓茵話，每年招聘約1萬名公務員，當中六成係30歲或以下青年，當局又推出多項針對措施吸引青年加入政府，包括提供短期工作同實習機會。楊何蓓茵話，安排大學生實習有助佢哋認識工作，又會視佢哋如「家人」，相信可避免「因誤會而結合、因了解而分手」。

楊何蓓茵提到，另一項吸引青年入政府嘅措施就係開放更多職系，容許大學三年級或升讀三年級嘅大學生投考，佢舉例，已有22個職系將於下一輪招聘時考慮大學三年級學生，當中有文職、專職同紀律部隊職位。

會上唔少議員關注近年公務員流失問題，工聯會黃國話，有公務員反映感覺自己社會地位減弱，又認為政府內部規管太嚴格，令公務員發揮空間收窄。楊何蓓茵回應，同意要加強公務員嘅榮譽感，又話已下放好多權力畀部門管理層，佢同意公務員嘅規條好多，但最重要部門管理層唔好過分規管，達到原先嘅規管目的就可以。