【Emily】新任國安署長董經緯首露面

【明報專訊】國務院上月中公布，由國家安全部副部長董經緯出任中央駐港國家安全公署署長，董經緯剛於過去禮拜日晚出席駐港解放軍舉辦嘅解放軍建軍96周年招待會，係佢接任公署署長後首度公開露面。

根據駐港解放軍微信「香江礪劍」上載當日活動嘅相，董經緯同特首李家超、中聯辦主任鄭雁雄、駐港部隊司令員彭京堂等上台合照。而較早前調任中聯辦副主任嘅外交部駐港公署前特派員劉光源，當日都有現身。Emily留意到，一眾嘉賓坐低合照時，劉光源坐喺第二排，外交部駐港公署署理特派員潘雲東坐第一排。

除咗特首同3名司長，最少有8名局長同數名行會成員都有出席，包括發展局長甯漢豪、商經局長丘應樺、醫衛局長盧寵茂、教育局長蔡若蓮、行會召集人葉劉淑儀、行會成員張宇人同陳克勤等；前特首曾蔭權同醫管局主席范鴻齡都有出席。