【Emily】私隱署提醒家長：出帖「放閃」前要問仔女

【明報專訊】時下唔少家長都會喺個人社交網站分享子女嘅動向，私隱專員公署噚日發布《家長「放閃」須知》單張，私隱專員鍾麗玲提醒，喺網絡過度分享子女生活點滴，或會為佢哋帶來長遠影響，包括日後升學或就業前景，鼓勵家長發帖前要尊重子女嘅私隱同個人意願，多與仔女溝通。

公署指出，若常喺社交網站分享子女動向，就可能係「放閃家長」，提醒家長唔好披露子女個人資料，例如全名、就讀學校等。公署話家長應考慮帖文內容日後會否令子女尷尬、影響其升學就業，強調若子女不悅或尷尬，就應刪除。

公署提醒，家長應避免發布關於子女過度私人嘅內容，指出子女亦有私隱同尊嚴，唔好過分利用子女吸引他人注意，唔好為「讚」而活，亦唔好喺未獲其他家長同意下貼佢哋仔女嘅相。