【Emily】14「皇仁同窗」發起幫陳校長籌款

【明報專訊】幫助基層兒童嘅「陳校長免費補習天地」，過往都會設獎學金鼓勵學生，不過近年可能因為疫情，仲未搵到資助，創辦人陳葒（陳校長）嘅同屆皇仁同學仔有見及此，決定發起「QC80補天進步獎學金」籌款。Emily噚日發現，今次籌款共同發起人嘅名單，原本有警務處副處長（國家安全）簡啟恩，不過只係維持咗約35分鐘，之後名單就冇咗簡啟恩個名。

國安警阿頭從發起人名單消失

睇番今次籌款，有成14個共同發起人，包括區域法院法官李慶年。佢哋嘅籌款目標係一年30萬元，籌款期去到年底，如果籌款超過30萬元，餘額就會留畀下年，未夠30萬嘅話就會全數捐畀「補天」，而佢哋?家呼籲1980年代喺皇仁學習同成長嘅學生參與籌款，上過一堂都計；如果唔係1980年代嘅皇仁學生，佢哋都歡迎捐款。

「補天」自2013年起每年設進步獎，用嚟鼓勵接受免費補習後有進步嘅中小學生、同埋成功升讀大學或大專嘅中六學生，每年都有超過300名基層學生受惠。