【Emily】懲教入職體測刪sit-up立地跳 靜態肌力代替 穿梭跑90米變40

【明報專訊】紀律部隊近年面對招聘困難，繼警務處、海關同消防處放寬投考資格同要求，懲教署噚日亦宣布，由9月16日開始，懲教主任同二級懲教助理嘅入職體能測試項目會由5樣減至4樣，穿梭跑次數亦會減少。

懲教署話，新嘅體能測試項目會由5樣減至4樣，包括用靜態肌力測試代替sit-up同埋立地向上直跳，仲將穿梭跑由9米乘10次，改為10米乘4次。原本嘅「俯撐取放」同800米跑就會保留。翻查資料，2022/23年度懲教署空缺率係10.1%。

署方：委專家檢討 更適合現工作

懲教署話，佢哋?家嘅體能測試項目同標準已經用咗差唔多20年，早前委託運動醫學專家幫手檢討，制訂更加適合?家懲教人員工作需要嘅體能要求。

署方近月仲將體能測試、《基本法》及《港區國安法》測試、小組面試同遴選面試由兩日縮短到一日完成。署方話會繼續積極舉辦唔同類型嘅招募活動，包括入職講座、工作坊、展覽及到大灣區嘅大學搞招聘會等，吸引多啲人投身懲教工作。