【Emily】同千人跳舞慶回歸 劉震：展現港魅力

【明報專訊】香港回歸慶祝活動直到7月尾都仲未結束，由鄭泳舜、馬逢國議員聯合辦事處主辦嘅「千人共舞慶回歸」噚日（30日）舉行，集合咗超過40個舞團1000名舞者一齊跳舞慶回歸。其間舞者表演各種中國傳統舞蹈，共舞時間邀請咗副文化體育及旅遊局長劉震等主禮嘉賓加入，圍圈左右踏步跳舞。

活動由鼓樂隊同迎賓舞拉開序幕，舞者喺台下舞池整齊排列，先以扇舞表演《勇敢的中國人》，其後同旁邊嘅舞者手拖手表演民族歌曲，隨住歡快嘅節奏輕輕踏步，最後喺舞池中央拼成代表香港嘅洋紫荊圖案，坐喺台上嘅嘉賓一齊跟住節奏拍手。

劉震感謝舞者為今次活動注入生命力，除咗慶祝回歸，仲係向全世界展現香港嘅活力同魅力，將步伐同舞蹈合為一體，共譜香港未來美好篇章。