【Emily】霍啟剛：查過晒國歌 亞運必冇事

【明報專訊】近年有國際體育賽事播錯國歌，嚟緊喺杭州將會舉辦亞運，立法會體育、演藝、文化及出版界議員霍啟剛（圖右）接受另一立法會議員鄧家彪（圖左）嘅網台節目訪問，就話絕對唔擔心出事，話作為團長之前都有出席團長會議，檢查過晒啲國旗同國歌，話絕對冇問題。佢仲話，對於過去見到有唔少不愉快事件都覺得好心痛，希望大家可以關注番成績同比賽，而唔係政治議題。

另外鄧家彪亦關注，喺《港區國安法》生效後藝術團體會唔會有咩顧慮，霍啟剛就以巴塞爾藝術展（Art Basel）為例，話當時都有畫廊問國安法詳情、參展會唔會有問題，不過最後都有唔少好評，入場超額爆滿，展覽由原本一層嘅展覽加開到兩層。佢話喺外國人角度，認為只係買賣做生意，唔會過度解讀國安法生效；佢又認為應該要360度去睇事情，如果純粹對藝術嘅追求同創作係冇問題，但如果做創作係為咗宣揚違反國安法嘅理念就唔得。