Emily Online｜甯漢豪籲學生永不放棄自己及家人 「工作都係我永不放棄目標」 (19:05)

適逢暑假，由麥潤壽創辦嘅「永不放棄同學會」同「永不放棄同學仔」今年同樣為中小學同學仔提供暑期學習課程。發展局長甯漢豪今日（29日）出席畢業禮以「永不放棄」為分享主題，提醒同學每個人都唔係完美，要記住唔好放棄自己。

甯漢豪話工作係佢「永不放棄」嘅目標之一，講到工作上仲有好多目標未達到，例如要搵多啲土地，令市民有宜居嘅生活，同埋要繼續努力做好交椅洲發展工作。另外局長都提到永遠唔會放棄屋企人，提醒現場嘅家長要俾子女知道，父母無論子女成功與否都唔會放棄佢哋，呢種支持會成為佢哋成長嘅動力之一。

今屆作為疫後第一屆，「永不放棄同學會」仲有大灣區同西班牙遊學團活動，其中應屆DSE考生林同學就係受呢個機會吸引而參加。林提到今次DSE不幸失手，未必入到最想讀嘅學科，麥Sir就鼓勵佢要「Be Open」，唔好被框架限制，反而要多啲增值自己，未來可以有更多出路。