【Emily】風扇仔度熱夜 林超英：咪PM我

【明報專訊】超強颱風杜蘇芮嘅外圍下沉氣流為香港帶嚟極端酷熱天氣，一向身體力行，堅持唔開冷氣嘅天文台前台長林超英前晚喺facebook發帖，話午夜港九市區氣溫大約32℃左右，自己由小風扇陪伴入睡，堅持唔開冷氣機，呼籲網民「請大家不用天天PM（私訊）我」。

曾教用風扇納涼 話3年「零電費」

對於有網民喺帖下面留言問「英哥半夜有冇偷偷哋開冷氣？」，林超英噚晚就話畀Emily知，佢自己3年嚟「零電費」（扣除政府補貼後）。留言區都有唔少人欣賞佢對環保嘅堅持，但勸佢唔好勉強，費事搞到中暑。

本港天氣酷熱，唔少人都好奇林超英究竟點樣做到喺屋企唔開冷氣瞓覺。上年8月，佢喺facebook講解自己點樣喺屋企製造氣流，改善室內焗熱，首先利用低耗電量嘅USB風扇或抽風扇「抽風入屋」，然後擺部「循環扇」喺入風口附近，將外來空氣帶到屋內各處，最後再由出氣口嘅抽風機吹番出去，咁就可以一直保持屋內空氣流通喇。