【Emily】青年創業體驗計劃招生 有小薯茄教宣傳

【明報專訊】非牟利機構青年成就香港部（JA HK）最新一屆「青年創業體驗計劃」，繼續接受網上報名至下月25日。14至18歲嘅同學可以透過呢個計劃接受培訓，有機會試吓創業。計劃為期7個月，當中請到YouTube Channel小薯茄創辦人程人富同高Ling喺一次工作坊分享網上宣傳技巧。

噚日舉行嘅啟動禮暨夏令營有超過100名義工同學生出席。JA HK董事會成員嚴志明致辭話，21世紀充滿唔肯定，但學校淨係令學生「接收知識」，希望呢個計劃會教識學生解決問題，裝備自己。

上屆同學分享突圍兩特質

上年參加嘅聖保羅男女中學中四蔡同學，當時創辦咗名為「珍．食」（Charish）嘅公司，賣水樽同飯盒，佢噚日分享突圍而出嘅關鍵係投入同責任感。佢又話公司營運時試過遇到廠商停產，好彩佢膽大心細，最後化險為夷，多謝JA HK畀機會佢學習。參加者經過連串活動後，明年3月將有實戰機會，到時藉JA青年創意實驗概念店賣公司產品。