【Emily】海上巡 岸上勸 宣傳勿追鯨

【明報專訊】自從本月中西貢水域出現鯨魚蹤迹，唔少市民出海「追鯨」，前日海洋公園同保育團體已經話鯨魚背部有螺旋槳造成嘅傷痕，令唔少市民擔心。噚日傍晚，署理特首陳國基喺facebook呼籲市民「不應在好奇心驅使下」坐船出海到糧船灣及牛尾海一帶水域追逐鯨魚。

陳國基話，已要求警方、漁護署和海事處加強宣傳，仲派出水警船喺附近海域巡邏，如發現有觀光船靠近鯨魚出沒一帶，會勸喻佢哋離開，亦會喺西貢碼頭等地勸喻市民及載客船負責人唔好「追鯨」。

陳國基稱不應好奇心驅使下追鯨

有網民喺facebook群組上傳一張「小紅書」截圖，圖中鯨魚上水張嘴，可以清晰見到鯨魚嘅粉紅色下顎，鯨魚同船嘅距離似乎未夠1米，上載者仲形容自己係「幸運兒」，惹起網民批評。

漁護署亦發文強烈勸喻市民唔好追鯨，發言人話，所有鯨豚動物均受《野生動物保護條例》保護，指不負責任嘅觀鯨行為可能構成故意干擾受保護野生動物，違者一經定罪，最高可被判監禁1年及罰款1萬元。漁護署話正密切監察鯨魚嘅情况，並同相關部門及非政府機構一同探討協助方案。