【Emily】128名內地港生 最快月底做警察

【明報專訊】警隊近年面對人手短缺，先後出招「搶人才」，上年11月起到內地各大城市舉辦「內地大學招募快線」。保安局噚日話，警方收到447份內地港生投考警隊職位申請，截至上月底有128名學生成功通過警員遴選程序，正做緊其他聘任程序，包括品格審查和體格檢驗，考生最快本月底、即下周一會成功獲聘任為警員；其餘319份申請仍喺遴選程序中。

申請做到60歲 2.25%不獲批

警方前年4月1日開始推出「超過訂明退休年齡的警務人員繼續服務計劃」，容許2000年6月1日前入職政府嘅現職非首長級警員申請延長服務至60歲。保安局噚日喺向立法會保安事務委員會提交嘅文件就提到，截至今年4月1日，警務處收到8661份申請，當中3439人已獲批准或原則上批准延長服務至60歲。

文件提到，有195人嘅申請不獲批准，佔申請者2.25%，原因包括工作表現、品行或健康狀况未符理想，其他申請仍然處理緊，預計明年完成所有遴選工作。