【Emily】網傳聲明或離婚 容海恩：唔係我寫

【明報專訊】警方國安處通緝8個涉嫌犯咗《港區國安法》、身在海外嘅民主派人物，佢哋部分家屬近日畀國安處帶走助查，包括立法會議員容海恩（圖）同佢老公袁彌昌。噚日網傳一張下款為「容海恩」嘅聲明，話「假若證實袁彌昌涉及危害國家安全行為，不排除與袁彌昌結束婚姻關係」。容海恩噚日回覆本報查詢，話呢份聲明唔係佢寫，又話「事件已進行刑事調查，不便評論」。

有網民噚日喺連登討論區出帖，上傳咗一張下款為「容海恩」嘅聲明，以「國之大義」為題。不過，帖文後來已被刪除。睇番資料，容海恩舊年登報發聲明，宣布同袁弓夷脫離翁媳關係，呢份「真聲明」亦係以「國之大義」為題，內文為「本人容海恩，作為流着偉大祖國之血的中國人，在國之大義的前提下……本人現宣布正式與袁弓夷先生脫離爺媳關係」。