【Emily】拍片招畢業生 葉劉：歡迎唔當我係「跑道」嘅人

【明報專訊】適逢放暑假，唔少公司都會趁機廣納人才，新民黨主席葉劉淑儀噚日就拍攝短片，公開招攬畢業生。葉太提出3個請人要求，包括求職者唔係急於搵快錢、最好修讀公共政策或國際關係，同埋有志從事公共服務及公共政策。佢喺片末仲開門見山咁話，歡迎唔係只想利用佢作為入政府嘅「跑道」嘅人，而係有心學習嘅求職者加入團隊。

近年有部分新民黨成員加入問責班子團隊，葉太喺片中都話，上年流失幾個優才、去咗政府，遲啲辦事處都有優才有「好路數」而離開，所以希望有年輕人可以加入團隊。葉太提到，提供嘅待遇唔似政務官隨時月入5、6萬元，不過都係合理嘅，希望搵到有心想長遠做公共服務、唔係急功近利嘅人才。佢並建議有心入商界嘅畢業生，就去大公司做MT（Management Trainee，管理培訓生）更好。