【Emily】參觀路署「組裝合成」升降機 議員盼「起得快啲平啲穩定啲」

【明報專訊】立法會交通事務委員會3個成員噚日去咗路政署，參觀署方點用3D打印技術，製成「組裝合成」升降機結構模型，預先喺廠房完成裝嵌升降機塔或部件，再運到工地做整體安裝，可縮短最多6個月施工時間。各人參觀咗升降機廠房嘅生產線，同埋已安裝嘅「組裝合成」組件，仲睇埋組裝示範。

建測規園界議員謝偉銓話香港人口老化，對無障礙設施需求愈嚟愈大，希望升降機起得快啲平啲，仲要提高穩定度同方便維修保養，唔好成日壞?，要老人家大熱天時行樓梯咁辛苦。

政府喺2012年推出「人人暢道通行」計劃，為公共行人通道加建升降機同斜道。一齊參觀嘅選委界議員陳紹雄就話，第一部以組裝合成加建嘅升降機今年5月開放畀公眾使用，第二部今年第三季都會啟用，希望政府繼續推出措施，鼓勵業界用組裝合成，應對建造業未來嘅挑戰。