【Emily】工程師學會與6企業合作 學員可快兩年入會

【明報專訊】香港工程師學會噚日同6間企業簽署合作約章，推廣工程專業，培育下一代工程人才，日後有份參與並符合資格嘅企業學員，透過為期兩年嘅「工程畢業生培訓計劃」再加兩年工作經驗（「2+2」），就可做學會會員，較原先需時6年快。今個月開始擔任學會秘書長嘅前創科局長薛永恒噚日有出席活動，不過就無發言。擔任副會長嘅前運房局長陳帆就無出席。

6間簽署約章嘅企業包括中國移動香港、自動系統、香港寬頻集團、華為、奧的斯、蒂升電梯。近月履新嘅工程師學會會長李志康話，上述公司部分擅長維修管理，部分主打資訊科技，認為透過學會嘅平台可以進一步聯繫各方。

李志康又話，學會可以幫參與約章嘅企業度身訂做講座及指導，亦可以吸引企業參與學會相關事務，注入新動力。佢又話，已簽約章嘅企業當中，符合條件嘅管理層亦會獲邀成為學會資深會員，盼可促進業界交流。