【Emily】李宣傳片中企理「蛇巷」 轉角有人小解

【明報專訊】特首李家超上任後，好快就提出打擊全港衛生黑點嘅措施，噚日佢喺社交平台發布有關《施政報告》諮詢嘅短片，亦講到呢項任務，提到長沙灣道171號旁邊嘅後巷「蛇巷」，仲搵嚟南昌街「蛇王業」店主張成受訪，話條後巷以前堆滿雜物，十幾年嚟都行唔到，但佢聽聞有電台聽眾致電反映「蛇巷」嘅問題後，好快就有政府部門清理兼清潔。

睇番影片中嘅「蛇巷」，拍攝當日陽光普照，完全見唔到有雜物堆積，甚至坑渠都唔多覺有污水。張成仲話，以往政府嘅清潔行動好多時好快就故態復萌，今次過咗一年都保持得咁好，大讚政府做到嘢。Emily嘅同事噚日去蛇巷睇過，發現都尚算乾淨，只係見到個別煙民入去食煙，之不過，一走到盡頭轉彎相連嘅後巷，就見到有「人有三急」者就地小解。

睇番政府打擊衛生黑點計劃嘅網頁，蛇巷正係重點打擊對象，衛生問題主因係有個女士長期霸佔後巷堆積大量雜物，仲養貓狗，惹嚟嚴重衛生問題同鼠患，政府一夜間清晒雜物，之後仲裝幾部攝影機，系統可透過比較照片確定可能係垃圾嘅物件，唔使靠人實時巡邏。