【Emily】出版雙年獎得獎作 入書展可睇

【明報專訊】第四屆「香港出版雙年獎」得獎名單上個月已公布，共有93項出版物獲獎，大會噚日喺書展舉行頒獎禮。大會話全部得獎作品除咗喺書展專門展位展出，「兒童及青少年」同「藝術及設計」類別嘅得獎圖書都會喺一樓嘅「國際文化藝術廊」展出。

今屆新增嘅「新晉編輯獎」由中華書局編輯葉秋弦憑《由電線車說起：駛過百年的軌跡》奪得，呢本書將香港過百年嘅電車歷史整理得鉅細無遺，仲附上超過500張珍貴圖片，由邀稿、編輯到營銷均由編輯主導，評審大讚得獎人「盡顯編輯功架」。

特別獎「市場策劃獎」就由「非凡出版」嘅《香港遺美——香港老店記錄》奪得，團隊除咗舉辦學校講座、攝影展覽、老店導賞等活動，仲製作埋英、日文版嘅小冊子推廣本書。