【Emily】訪合肥AI企業 議員擔心教師飯碗

【明報專訊】立法會考察團日前結束福建之旅，5個有創科背景嘅議員葛珮帆、吳傑莊、邱達根、黃錦輝、尚海龍之後去咗合肥考察，噚日結束行程，會再轉去山東青島考察。佢哋喺合肥嘅3日去咗幾間大型科創企業參觀，仲參與皖港科技聯合創新合作論壇，仲同合肥市領導見面交流。佢哋噚日就去咗安徽創新館，了解當地唔同領域嘅創新科技同高端製造產業發展，包括新能源汽車、智能家電、航空航天裝備等。

去完合肥 會再去青島

今次考察嘅重點之一就係去參觀內地大型科創企業，其中科大訊飛係亞太地區知名嘅智能語言同人工智能企業，喺智慧教育、智慧醫療、智慧城市等領域深度應用智能語音同埋人工智能技術，連立法會秘書處早前都買入佢哋嘅人工智能語音軟件，逐字做會議紀錄，?家軟件仲學緊廣東話，要遲啲先可以喺更多立法會會議應用。

吳傑莊即場試用科大訊飛嘅翻譯筆，話利用AI語音系統就可以即時翻譯多種語言，改功課又唔使一分鐘就搵到合適答案。呢個系統咁厲害，難怪吳傑莊都感嘆，話老師嘅工作以後係咪會被取代。