【Emily】陪處長勉小朋友迎難而上 援土國消防犬書展搶晒鏡

【明報專訊】中華出入口商會、教育工作者聯會主辦嘅「我們一起悅讀的日子2023」小學組學生慈善活動啓動儀式噚日喺書展舉行，希望鼓勵學生養成閱讀習慣同培養寫作興趣。今年嘅活動主題係「勇毅前行」，主辦單位邀請咗唔同嘉賓到場分享，鼓勵小朋友勇於面對挑戰，迎難而上，嘉賓包括消防處長楊恩健，佢噚日仲帶埋消防搜救犬Umi到場，搶晒風頭！

Umi上台想玩咪 逗笑全場

楊恩健向小朋友講解咗消防處嘅主要職責、服務範圍、使命同埋「救災扶危，為民解困」嘅信念，又講到消防處喺疫情嗰陣所面對嘅困難同挑戰，例如人手短缺等。

楊恩健亦解釋，消防員喺災區救人嘅時候，有時會有搜救犬幫手，就好似參與過土耳其地震災區搜救嘅Umi。Umi一入場就非常受歡迎，引起全場小朋友嘅注意，好多小朋友都想摸吓佢，又走上台同佢合照、互動，現場亦有好多人舉起手機影低Umi，而Umi因為平時玩嘅玩具係長條形狀嘅，同支咪好似樣，所以佢喺消防員揸住支咪講嘢嗰陣就不停撲上去想玩，全場笑聲四起。