【Emily】福建考察完 議員望施政報告前交意見

【明報專訊】立法會福建訪問團噚日踏入最後一日，立法會主席梁君彥總結行程，形容成果豐碩，一眾議員返港後會就訪問團撰寫報告，冀趕及10月特首發表《施政報告》前向政府提交意見。佢認為香港同福建可以就好多範疇合作，特別提到兩地同為航運中心，可以互補優勢。

梁君彥倡航運合作 助閩企上市

訪問團噚日與福建省委常委、廈門市委書記崔永輝會面，討論如何加強廈門同香港嘅聯繫合作，又與廈門市委統戰部交流。議員亦有到廈門自由貿易試驗區考察，參觀咗園區嘅大數據服務中心、廈門國際航運科創中心同廈門海上世界，仲去埋廈門規劃館同陳嘉庚紀念館參觀。

國家主席習近平曾任福建省長，梁君彥讚揚習近平主政福建期間，「制定咗好多高瞻遠矚嘅政策同發展方向，令到福建有今日嘅發展成果，亦有唔少值得香港借鏡」。佢話除咗航運方面，香港可以協助福建企業來港上市，又提到兩地就文化範疇可加強交流。

民建聯周浩鼎就認為「一帶一路」嘅商貿協議數目不斷增加，舉例廈門企業亦有與一帶一路國家合作，相信可以使用香港嘅爭議解決及仲裁服務。