【Emily】房協桌遊書展亮相 邊玩邊學港住屋史

【明報專訊】香港書展噚日開鑼，房屋協會推出全新嘅75周年教育桌上遊戲「宅星鬥士」，鼓勵年輕一代從遊戲學習香港房屋發展知識，同埋了解房協作為「房屋實驗室」嘅建屋里程碑，公眾喺書展期間都可以試玩。

採長者友善設計 入場可試玩

呢套桌遊以雙層設計，下層展示房協多個耳熟能詳嘅屋邨，上層係記載房協唔同年代發展項目嘅「歷史迴廊」，融入香港房屋階梯知識、可持續發展及跨代共融等元素。房協行政總裁陳欽勉話，「宅星鬥士」貼近年輕人興趣、寓學習於娛樂，同時採用長者友善特大棋盤設計，鼓勵長幼齊參與，互相分享昔日房屋故事同生活點滴；而房協都會邀請位於房協屋邨嘅中小學師生去書展試玩。

另外，新鴻基地產新閱會今年繼續同香港科技創新教育聯盟合辦「新地齊讀好書 X 未來工程師大賽」，收到近300份作品，創歷屆新高，新地亦透過教聯會、北區小學校長會同深水埗居民聯會組織800個基層學生，每人獲250元買書津貼，喺今年書展購買與STEM同中國文化相關書籍。