【Emily】議員訪廈門華僑大學 讚港生有抱負

【明報專訊】立法會外訪團由福州去到廈門，噚日去咗有超過2000個香港學生嘅華僑大學（廈門校區）同港生交流，聽吓佢哋喺當地生活同學習嘅情况。立法會主席梁君彥喺facebook話，班議員都讚歎呢班學生嘅幹勁同毅力，又大讚佢哋既有抱負，又敢於創新同靈活變通。

有學生話當初係為咗拓寬眼界而去內地讀書，其間學習到中國文化，認識到鄉村振興同埋兩岸關係，認為自己具備雙重認知嘅優勢，而香港就業機會比較多，所以畢業後想返香港投考紀律部隊。之後一眾議員就去咗被列入世界文化遺產名錄嘅鼓浪嶼，參觀咗島上嘅建築群、博物館等，了解市政府對鼓浪嶼嘅保育工作。

另外，幾個有創科背景嘅議員噚日就啟程去合肥、青島考察，仲同埋創科局副局長張曼莉、業界代表一齊去，佢哋會到唔同地方交流，包括中國科學技術大學，話去探討吓香港同內地省市就科創方面嘅合作。