【Emily】放榜前返華仁幫師弟打氣 陳浩濂不忘講「經」

【明報專訊】DSE今日放榜，財庫局副局長陳浩濂噚日就返咗母校香港華仁書院同師弟打氣。佢同Emily講，每年都有返去同師弟交流，一方面想了解吓後生一輩嘅想法，同時亦希望分享自己嘅人生經歷同埋香港經濟嘅最新發展，希望對佢哋生涯規劃有幫助。陳浩濂噚日都有同學生講老本行，介紹金融發展，話金融科技同綠色科技係大趨勢。

科大校長葉玉如噚日就上載短片為考生打氣，話佢研究腦神經科學幾十年，遇過唔少困難，有時實驗結果未如理想，但佢唔會灰心，「因為我知道每一個過程都係寶貴嘅經驗。雖然可能今次失敗咗，但係可以參考失敗原因，下次就可以做得更加好」。

美領館教打氣俚語break a leg

美國駐港澳總領事館就乘機教大家英文俚語，話美國人除咗會同人講「good luck」，仲會祝人「break a leg」，意思唔係咒人整親腳，相反係叫你加油咁解。