【Emily】書展搞廚餘回收 做得啱送爆谷

【明報專訊】一連7日嘅書展今日開幕，會展管理公司首次喺書展推出廚餘分類回收，市民將廚餘同廢物放入正確嘅回收桶，可免費換領爆谷一份。

今屆書展，會展管理公司推行「綠在會展」行動，喺美食區同埋參展商用膳區設置廚餘、廢物分類回收桶。「綠在會展」大使會教市民點樣回收廚餘廢物，只要分類正確，大使會送出一張免費爆谷換領券，數量有限，先到先得。而會展小伙伴「嚟妮」會喺周六周日中午至下晝3點，去到美食區同小朋友玩遊戲，小朋友答中有關廚餘分類嘅問題，都會獲送一張免費爆谷換領券。

會展管理公司仲話，書展期間自攜飲品杯到美食區、參展商用膳區、展覽廳內嘅小食亭同埋港灣茶餐廳購買咖啡或茶，有3蚊折扣優惠。

九巴推過海線學生半價

另外，九巴早前推出「夏日賞童遊」活動反應熱烈，適逢會展7至8月舉辦書展同動漫節，九巴為學生推出為期約兩周嘅指定過海線半價優惠，同日使用次數不限。九巴另喺今年書展擺攤位賣多款新巴士模型同聯乘商品，其中4款巴士模型更加係「期間限定」。