【Emily】城大教碩士課 班上八成內地生 鍾國斌：全班得兩人話會留港

【明報專訊】立法會紡織及製衣界前議員鍾國斌（Felix）告別議會生涯後，唔止重回紡織界嘅工作，上年仲成立咗「香港碳貿易中心」，聯同環保團體、認證公司等專業人士，為企業提供碳審計同埋碳交易等工作。唔止呢啲，Emily噚日喺Felix嘅facebook上見到，原來現時佢有喺城市大學教碩士課程，不過似乎唔多學生想留喺香港發展喇。

此話何解？根據Felix嘅facebook所講，佢早前喺城市大學教授關於氣候變化同埋碳中和嘅碩士課程，班上超過八成學生都係來自內地，當Felix問班學生讀完書後會唔會選擇留喺香港發展時，喺坐咗唔少學生嘅教室中，只有兩個學生舉手話會留港，其他決定返去自己本身居住嘅地方。

Felix都忍唔住感嘆「香港真係咁冇吸引力咩」，有網民則留言話「嗚呼哀哉」。政府近年推出措施，希望可以吸引到非本地學生留港發展，睇番?家呢個情况，唔知Felix有冇同政府傾吓呢。