【Emily】唔怕郵局關 23自助投寄機覆蓋18區

【明報專訊】香港郵政近期推出自行研發嘅「智郵寄」，機器配備3D掃描器，可自動量度郵件尺寸和重量，方便市民不受郵局營業時間限制，可以隨時自助投寄兩公斤或以下嘅郵件，將郵件放入機器，就會計算到要畀幾錢郵票，然後即時付款及投寄。香港郵政話目前已有23部「智郵寄」投入服務，覆蓋全港18區。

另外，為咗「送信純熟迅速送出」，香港郵政舊年引入機械人郵包分揀系統，自動掃描同記錄郵包上嘅條碼、量度重量尺寸，再由分揀機械人運送到卸貨架。搬運機械人就會按系統內嘅收件地點資料，自動送到相應工作站，由職員封袋再運往派遞點。

香港郵政總經理（郵件處理）鄭婉明話，新系統可提升工作效率約兩成，亦可減少職員以人手分揀郵包時所涉及嘅重複動作或人力提舉，有助提升職業安全和健康。