【Emily】走訪福州三坊七巷 議員倡港借鏡保育

【明報專訊】立法會主席梁君彥日前帶團去福建考察，第二日就去咗歷史文化街區三坊七巷。翻查資料，三坊七巷整體格局有逾1100年歷史，保留嘅逾150座古建築群屬明清建築，每座有三四百年歷史。梁君彥仲特別提到，保留呢區舊建築，係國家主席習近平政績之一。唔少議員大讚三坊七巷嘅古建築群好靚，旅遊界議員姚柏良認為，三坊七巷可以做到文化、旅遊融合，香港都有古村落文化，值得借鏡睇吓可以點樣保育同發展。

梁君彥喺facebook介紹三坊七巷，話習近平於1995年出任福州市市委書記時，主持福州市第十屆人大常委會第十九次會議，通過《福州市歷史文化名城保護管理條例》；喺2005年福州市政府收回三坊七巷嘅土地使用權，開展保護修復工程。佢亦大讚三坊七巷嘅保育理念好值得推崇，主張「修舊如舊」、定格「舊歲月」、煥發「新活力」；又提到三坊七巷有唔少近代名人居住過，福州市政府就將呢部分故居活化，用嚟做展覽，喺考察期間，一眾議員都見到有唔少年輕遊客嚟打卡，認為當地嘅保育活化工作做得好成功。