【明報專訊】近日天氣酷熱，天文台仲預測今日市區最高氣溫會去到36℃，立法會前議員邵家臻噚日喺facebook發帖，話同民主黨成員林子健去咗赤柱監獄，探望因「35+初選案」被控違反《港區國安法》而還押緊嘅港大法律系前副教授戴耀廷（Benny）。邵家臻憶起自己喺赤柱監獄在囚嘅日子，亦深受酷熱之苦。
邵家臻話，赤柱監獄熱到火爐咁，暴曬一日，牢倉之熱、之焗、之熱氣，就算毫無動靜一樣爆汗。佢又話赤柱監獄囚倉一般係3層，愈高愈熱，三樓比二樓熱，二樓又比地下熱，Benny身處層樓唔係最熱，係「好彩」，但邵當年喺赤柱係住三樓，當時一打開門，熱氣就撲面而來。
