【Emily】法國慶酒會 林定國搶閘祝酒 3前特首前後腳赴會

【明報專訊】法國駐港澳總領事館噚日舉辦法國國慶日酒會，3任前特首曾蔭權（Donald）、梁振英（CY）、林鄭月娥（Carrie）少有前後腳出席，其中CY同Carrie到場逗留咗一陣就走，而曾經畀CY入稟告誹謗嘅立法會會計界前議員梁繼昌（Kenneth）就同CY擦身而過，最終「冤家不聚頭」，Kenneth可安心享用法國靚酒。

法國駐港澳總領事杜麗緹致辭時，特別感謝3任前特首支持法國同香港關係。佢又話期待香港同法國喺商貿、文化同旅遊方面增進伙伴關係，亦期待喺一國兩制框架、堅持法治同基本自由下，強化同香港嘅關係。

代表港府出席嘅律政司長林定國（Paul）就以前法國外方傳道會大樓、位於砲台里嘅前終審法院大樓為例，話香港同法國有好長嘅關係。雖然法國行大陸法，Paul就提醒有意深化內地市場嘅法國公司，香港喺亞太區擔當法律服務樞紐角色，會繼續堅持法治同司法獨立。致辭尾段，Paul搶閘幫主人家祝酒，順便騷咗句法文「vive la France」（法國萬歲）。