【Emily】原定9月底 立會全體訪京押後無期

【明報專訊】立法會全體議員原定9月下旬到北京訪問，不過據Emily了解，一眾議員剛收到通知訪京團將會押後，但延後無期，亦未有交代原因。多名議員同Emily講，估計因為北京方面嘅官員屆時比較忙碌，無暇接待訪問團，所以要延期。

料京官無暇接待

訪京團原本為歷來首次全體立法會議員訪京，由特首李家超率領，預計會同負責港澳事務嘅中央官員見面，亦會到雄安新區考察。有議員話噚日突然收到通知訪京團要押後，原本被要求預留9月底嘅「學習」時間，?家亦可自由活動，但唔知道押後嘅實際原因。

今屆立法會多次出訪，除咗4月由李家超帶官員同逾80個議員到大灣區考察，聽日亦會趁立法會大會休會，到訪福建5日。福建團由立法會主席梁君彥率領，共34個議員參加，行程包括同福建省領導會面、考察福州新區、同當地港商見面等。多個事務委員會亦喺休會期間出訪，包括教育事務委員會去新加坡考察，民政及文化體育事務委員會就去杭州了解亞運籌備情况。