【Emily】林健鋒劉業強獲勳 請食燒豬謝支持

【明報專訊】立法會經民聯（商界一）議員林健鋒、鄉議局主席劉業強分別獲政府頒授大紫荊勳章及銀紫荊星章，佢哋噚日趁立法會「放暑假」前最後一次大會，準備咗燒豬答謝大家支持。林健鋒話劉業強係合作好友，會繼續保持城鄉合作。

經民聯議員噚日先喺立法會宴會廳同立法會主席梁君彥合照，其後林健鋒、劉業強就同其他職員及記者分享燒豬，並祝願大家工作順利、身體健康。身兼鄉議局主席嘅劉業強感謝鄉議局同鄉民嘅支持，會繼續擔任政府與新界人嘅橋樑。

林健鋒之後喺社交平台發文，話自己做公職超過40年，經歷唔少風雨同高低起跌，感恩依然健康平安，同埋可以廣交朋友。佢話今後會加倍努力，繼續凝聚香港嘅有心人，一同為香港服務。

疑食物中毒 江玉歡慶生盼健康

另立法會議員江玉歡（Doreen）噚日生日，佢除咗同議辦同事切蛋糕慶祝，亦請記者食糕點。Doreen話自己上周末懷疑食物中毒，所以生日願望係身體健康，同時期望未來議會工作更全面。新民黨立法會議員亦趁暑假休會前，買咗獲米芝蓮推介嘅「添好運」點心請記者食，各人落場推「點心車」，黨主席葉劉淑儀笑言因為?家餐飲業人手短缺喎。